「牢籠 vs 自由」的風景 – 香港街道上一條不一樣的欄杆

元朗區議員陳敬倫利用木板同街道欄杆，創作出耳目一新嘅橫額。當創意遇上街道上刻板嘅欄杆，碰撞出獨有嘅裝置藝術，引起社會迴響。前年烽煙過後，唔少街道欄杆都被拆除，引起民間對拆欄嘅呼聲，卻在運輸路政嘅冷處理之下無疾而終。

係嘅，欄杆的確樣衰同阻埞。除咗為街道添上壓迫感、阻隔行人用最直接嘅方法過馬路，近年嘅研究亦發現，連綿不絕嘅欄杆助長司機開得快，對交通安全有害無利。但係無可否認，咁多年來欄杆已經融入咗香港街道獨有嘅風景，亦有街坊各自各地道嘅用途。

街道上有過多欄杆嘅現象，不得不追溯到香港一直崇尚汽車嘅傾向。除咗因為擁有私家車代表經濟地位同私人空間，亦由於規劃上存在嚴重嘅居職分離，需要四通八達嘅汽車幹道，讓無論揸車、搭巴士定搭的士，都能夠好快直接由A到B。

所以，我哋比起其他城市 (例如倫敦)，有多好多天橋同公路。呢啲快速幹道往往緊接著街道，需要司機快捷並頻繁地減慢車速。一向傳統嘅運輸路政，思維就係「與其令車輛去到街道上就減慢車速，不如就起哂欄杆，將人車分隔推到極端，以做到路上零意外。」但以現今嘅街道設計思維來講，呢個係 Defeatist 嘅舉動：唔單止令行人受到嚴重車禍嘅機率增加，亦不利單車安全同使用。呢個就係我認為，點解咁多年來，街道規劃都一成不變嘅原因。

喺咁嘅城市形態裏面，要大規模拆欄，讓街道真正開放俾行人同單車使用者，需要運輸部門同政策全面嘅革新。對此喺可見嘅將來，我並非特別樂觀。既然拆唔到欄，或者反而可以利用佢哋，融入創意同藝術，令城市嘅風景更加多元。畢竟欄杆嘅存在，本身就帶有「牢籠 vs 自由」嘅意象。喺極權嘅年代，其實好使好用。