我地嘅街道為誰服務？

唯有逐步從車輛手上收復空間，街道環境先有條件變好。

一、路面空間係公共資源，但香港一直存在著非常不公平嘅分配：私家車佔大部分幹道流量平均 55%，但只佔每日整體路面客運量的 15%。但巴士及小巴的情況相反，兩者共佔流量平均 15%，但佔客運量約 70%。[1] 私家車載客效率好低，卻佔用大量路面空間。

二、政府從不積極遏止私家車數量增長，亦無意設立更多巴士專用路面，使巴士乘客免受塞車波及。2009 年到宜家，私家車數量爆升接近五成。[2] 以香港接近九成交通行程使用公共交通嘅情況黎講，呢個數字實在不合理。 [3] 塞車、無位泊係好痛苦，但正如第一點所講，現時路面規劃已經係向私家車強烈傾斜，此為重點。

“You are not stuck in traffic. You are traffic.” (Imgur)

絕大部分乘客行程使用公共交通，只有約一成使用私家車（立法會)

三、「以地事秦，猶抱薪救火，薪不盡，火不滅。」周圍塞車、泊位短缺、違泊等問題加劇，源於食大左個胃。繼續向車輛相讓更多空間，我地嘅城市只會無止境地沉淪落去。唯有逐步從車輛手上收復空間，街道環境先有條件變好。乜野智慧城市、咩好易行計劃，根本無處理問題根源。

四、我地必須正視同糾正，側重汽車嘅規劃所帶來嘅負面影響。唔直接挑戰呢樣野、繼續打擦邊球，地方營造 (Placemaking) 只會到喉唔到肺。街道變革 Street Reset 嘅存在，係要挑戰呢個現狀。唔單止係口水組織，仲想科普有關人本街道嘅規劃設計知識，為任何關注此議題嘅人充權，甚至能夠進化到可以同體制周旋。

五、呢個城市只有 14% 嘅住戶擁有私家車。[4] 無車嘅人自然係呢個 Campaign 嘅主要對象。點樣係最快最有效嘅方式，將上述嘅觀念普及？如果你有諗法，不妨入 Group 留言集思廣益。

街道變革 Street Reset

https://www.facebook.com/groups/597385401058525/

#我地嘅街道為誰服務

—
[1] 2014 年交通諮詢委員會 《道路交通擠塞報告》https://bit.ly/2VFqw4I
[2] 2019 年立法會秘書處《選定地方控制私家車增長的措施》https://bit.ly/2RPUbXH
[3, 4] 2011 年運輸署《交通習慣調查》 https://bit.ly/3biasfS